¿Onde está a Concellería da Muller?

Puentes avanza que creará a Concellería da Muller para atender permanentemente as necesidades das fenesas
A presidenta do Parlamento galego arroupou ao candidato do PSdeG-PSOE na presentación en Fene do seu programa en materia de muller.
La Voz de Galicia 16/05/2007
O candidato do PSdeG-PSOE á Alcaldía de Fene, Iván Puentes Rivera, avanzou hoxe o seu compromiso, de recibir a confianza dos seus veciños, de promover, a nivel comarcal e a través da Mancomunidade de Municipios, a creación dunha Oficina Permanente de Atención ás Víctimas de Violencia de Xénero. Puentes Rivera realizou este anuncio hoxe á tarde, no Parque Lineal do Río Cádavo, onde presentou as políticas dirixidas á muller que os socialistas levan no seu programa electoral para os comicios do día 27. Un acto que contou coa asistencia da presidenta do Parlamento galego, Dolores Villarino; das mulleres que integran a lista electoral do PSdeG-PSOE en Fene, e de veciñas e veciños do municipio.
Puentes Rivera destacou que os socialistas presentan un ambicioso programa en materia de muller. E, nesta liña, o alcaldable do PSOE lembrou que no 2004 o Concello de Fene aprobou o primeiro plan de igualdade de oportunidades entre homes e mulleres, aínda que dende ese ano nada se avanzou nel. Ofreceu tamén unha serie de datos que, ás claras, constatan a necesidade de mellorar a situación das mulleres en Fene. Así, indicou que representan o 51,3% da poboación total da localidade, así como que a taxa de ocupación feminina en Fene é caseque a metade que a dos varóns e a dobre en canto ao paro.
Un dato alarmante para Puentes é que tan só o 7,5% dos traballadores cualificados son mulleres, fronte ao 92,5% que corresponde aos homes. A pesares de que os datos municipais revelan que o número de mulleres tituladas (con diplomatura ou licenciatura) é moito maior ao dos homes.
Así as cousas, o candidato socialista indicou que a súa intención pasa por crear a Concellería da Muller co obxecto de pór fin a estes alarmantes datos. Ao respecto e para facilitar a incorporación deste colectivo ao mercado de traballo, Iván Puentes anunciou que dende o Concello primará a contratación de obras e servizos a aquelas empresas que apliquen a Lei no Traballo en Igualdade das Mulleres de Galicia, á par que favorecerá a concesión de axudas e subvencións a este tipo de compañías. Outro dos obxectivos dos socialistas pasa por potenciar o Consello Sectorial da Muller e favorecer o acceso á vivenda pública por parte da xente moza, das familias con menos recursos, das mulleres víctimas de malos tratos e daquelas con cargas familiares

Outra vez máis, o Alcalde non lle fai caso ao slogan de FENESTRADOS, ese sabio refrán que di "en boca pechada... non entran moscas! e fachendea que vai potenciar o consello Sectorial da Muller, favorecer o acceso á vivenda pública da xente moza, etc, etc.
Logo de tres anos des-gobernando non foi capaz nin de crear a Concellaría da Muller. En fin...

Algún ten que ser deFENEstrado!!!